وشائج محبّة

ربّما أنا مواطن عندي خبرة ومارق عليي إشيا كتيرة بهالحياة، بس كلّو هون...

في محيطي، في بلدي، في الأرض يللي عطتني صفة المواطن... بكلّ أبعادها !

بس كمان بعترف إنّي ما كتير بعرف عن مواطنين بلاد برّا... برّا، يعني البلاد يللي اغتربلها

كتار من الناس يللي بعرفن... الأدمغة، تبع هجرة الأدمغة يللي منقرا عنها!

كلّ ما كنت قول شو عبالي عيش برّا... نيّالكن عايشين برّا... كانوا يقولولي خلال زياراتن 

لربوع الوطن للتمتّع بالسهرات والضهرات والتكريم، كانوا يقولولي: ما تكون غبي!

صحيح برّا في كلّ شي... كلّ شي... وهون ما في شي، إنّما... هون عندكن الأهمّ يللي برّا ما

 عندن ياه: العيلة! المحبّة بين أفراد العيلة! التعاطف بين القرايب! التضحية في سبيل الإخوة.

فعلًا يا زملائي المواطنين، هون غير شي... ما في أحلى من العيلة... فعلًا عنّا غير شي...

قديش مارق عليي، ولا مرّة شفت إخوة مقاتلين كرمال... كرمال، شقفة أرض.

ولا مرّة عرفت إنّو خي زعل من خيّاتو لأنن ما قبلو يعطوه توكيل بالأملاك تا يلعب بالكازينو...

إذا بتراقبو متلي، بعيد عن السامعين، بالعزا... شوفوا هالقرايب كيف بيعبّطوا بعضن 

وبيتباوسوا أكتر من الفنّانين لمّا يهنّوا بعضن بشي فيلم أو مسرحيّة... عن جد... ما بتسمعوا 

إلّا: يا خيي يا حبيبي... يا إختي يا عيوني  ووهههوو... وشلي و دموع... محبّة وروابط

 ووشائج قربى... كلّ "وشيجة" أمتن من غيرها.

وما في يومين، قد ما عندن حسّاد، بيصيروا العِدا يطلّعوا عليهن إشاعات: 

قبّروا بعضن كرمال الورتة... الخي ما بيحكي مع خيّو لأنّو مرت خيّو ما بدّا تساعد مرتو

 بالتحضير للأربعين ..الخيّات حلّشو بعضن كرمال لمين بيت العيلة يللي بالضيعة...

حسّاد وبيحكوا!!!!

والبرهان، خلّينا نتطلّع حوالينا: بعمركن شايفين عنّا ولاد عمّ ساحبين سلاح عبعضن كرمال كلب صيد؟ متلًا... كلّو برّا!

شي مرّة سمعتو عن أهل ختيروا أو ضيّعوا، فانزتّوا بالمأوى؟ أو متلًا إذا اضطرّوا... اضطرّوا ولادن يعملوا هيك، مش كلّ يوم بيعملوا الولاد وفد وبيروحوا يزوروهن؟ 

يا غبي، يعني أنا، محبّة، عاطفة.. وين بدّك تلاقيها برّا؟

الحمدللّه!  نعمة كريم... طيّب إذا هيك العيشة برّا، ليه ما بترجعوا نهائيًّا للربوع وبتعيشوا

 العاطفة والمحبّة؟

ويا سؤال يللي سألتو:  باك شي  إنت؟ غبي؟ إذا رجعنا كيف بدنا نضمن آخرتنا، مين 

بدّو يلتفت فينا...  بعدين شو بدّي إرجع أعمل... تا يضلّ وجّي بوجّ إختي هالحيّة وجوزا؟

جمعتين صرلي هون ما إجو قالولي الحمدللّه عالسلامة... و... هيك! ما هيك؟