شي!

في شي ما كتير عم بفهمو... منّو شي واحد بس! هنّي كم شي...

بس يللي عم بحكي عنّو اليوم و ما عم بفهمو هو : كلمة شي! 

صحيح أنا مواطن بسيط شوي وفهماتي عقدّي وأحيانًا غبي، بس هالنقطة بحدّ ذاتها كتير صعبة...

شي!...إذا بدّي آخد موعد من حدا بقلّي: يللا، منتلاقى شي عشرة، عشرة عشرة ونص ّ... إنّو ما بيكفيني مش عارف إذا عشرة أو عشرة 

ونصّ ، كمان في قبلها شي؟ وبحتار ..

أيّ ساعة بروح؟  إذا رحت عشرة بيجوز أنطر، و إذا رحت عشرة ونصّ، بيجوز غيري ينطرني، و أنا لا بحبّ أنطر ولا بحبّ نطّر...  طيّب وشي، شو بعمل فيها؟ 

بسأل حدا عالطريق: وحياتك قدّي بدّي تا أوصل من هون عالمطرح الفلاني؟  ما أنا كبرت قبل ما يخترعو الجي بي اس .

-      يعني ، شي نصّ ساعة، تلات رباع الساعة، ساعة إلّا شي !!!

حتى لما تعلّمت عال جي بي اس... حطيت لوكاشيون، كتبلي :بدّك شي ربع تلت ساعة... حسب...

تحديد؟ أبدًا... ما حدا بحدّد! 

قدّيه بتكلّف هالشغلة؟  تا شوف إذا بوصّي عليها أو بشتريها...

مش رح نختلف! إيه شو أنا جايي وقاصد نختلف؟ أنا جايي تا أعرف إذا قادر أو لأ!

-      قد ما بتأمر... ما فهمت! 

-      بلا مصا ري! كمان ما فهمت!

-      طيّب كلمة واحدة؟ خي إيه هيك من الأوّل، كلمة واحدة!

-      شي ألف ألف وخمسميّة...

مبارح قرّرت كون حازم وواضح ومحدّد. سألت عن سعر طاولة وأربع كراسي بلاستيك .

و قلتلّو لزميلي بالمواطنيّة البيّاع:  بدّي السعر عالقدّ! دغري! واضح! 

قلّي طبعًا، سعرنا واضح ومحدّد : 30 دولار الطاولة. كلّ كرسي 5 دولار. 5 ضرب 4 عشرين... عشرين زائد تلاتين. اجمعن إستاذ

 قلتلّو: خمسين! يعني سعر هالغراض خمسين دولار! 

صفن شوي وقلّي : هيك شي !!!

بقى كيف لقيتو هالشي؟ بتوصّونا شي؟ يعني إذا شي، منشوفكن شي يوم !!!