الحالة...

مبارح مرقت عند المعلّم يوسف، لحّام الحيّ، قلتلّو لازمنا وقية ونصّ مفرومة... المواطنة الأغبى منّي لأنّها أخدت المواطن الغبي، بدّا تعمل شيخ المحشي...

تكرم!... وإذ بتفوت مدام: بونجور معلّم... ما لحق يقول أهلا مدام، لحظة لو سمحتي.. شالت الموبايل وبلّشت تقرا: 3 كيلو بفتاك، 3 كيلو كوردون بلو، شهبايتين، 4 فيليه قد ما كان وزنن، 5 كيلو مفرومة خشنة دورين و4 كيلو ناعمة ولا نسرة دهنة...

آه إيه، وبدّي قصب!

قصدك قصبة مدام؟

نو، مش واحدة بس.. قصب قصب.. بلوزيور...

ماشالله مدام، عزيمة كبيرة الله يبارك!

نو... ولووووو... أنا وجوزي بس بالبيت مش رح كتّر... ما هوي جوزي عامل قطاعة كرمال الصوم، وأنا

….Vegetarienne 

صفن المعلّم يوسف : بس مدام كلّ هالطلبيّة؟

ولوووووووو... مش شايف الحالة؟  يللا حضّرن تاكون رجعت عالسوبرمارشيه، تاركة هونيك 5 عربيّات عالصندوق، لازم حاسبن..

طيّب فينا نمرّق وقية ونصّ مفرومة للمواطن؟

تطلّعت فيي المدام وقالتلي : ولوووووو موسيو بالدور بليز... إنّو لأ يا معلّم، بلكي ما بقيلي...

ضلّينا أنا والمعلّم يوسف صافنين تا رجعت المدام مع سيارة ثمانيّة الدفع متروسة... الغراض مدلوقين من الشبابيك... وعشر لفّات ورق تواليت عائليّة مربّطة بحبال عسطح السيّارة...

ايه... الحالة !!!!!  الله لا يجرّبنا... لحقت سيّارة المدام ، دقّيت عالشبّاك... مدام اذا بتحبّي تشرّفينا انتي والموسيو عاملين شيخ المحشي بلا لحمة... قاطع وفيجيتاريان!