يوميّات مواطن غبي
مرحبا! أنا مواطن متلي متلكن ..متل الكلّ. إنّو... مفكّر حالي متل الكلّ. كلّ يوم الصبح لمّا أوعى بكون مفكّر حالي متل الكلّ... بس كلّ يوم بيصير معي شي بيخلّيني إرجع عشيّة وإسأل حالي: صحيح أنا متل الكلّ؟ أو أنا بس لوحدي غبي؟
ما إلي إلّا إنتو... كلّ مرّة رح خبّركن شو صار معي وإنتو قولولي: أنا مواطن متل الكلّ أو مواطن غبي؟
اليوم، وعيت الصبح متل العادة بلا منبّه. مش نشاط بس أنا من التنين للجمعة بوعى بلا منبّه .ما أوتوكار المدرسة يللي بياخد ولاد جيراننا بيوصل لتحت البيت الساعة ستة إلّا ربع.
و بيزمّر!
مش بيزمّر... بيزمّر!!!!! وتحت البيت يعني مباشرةً عشبّاك الطابق الأرضي. ومين ساكن بالطابق الأرضي؟ أنا...المواطن.
بقى من التنين للجمعة: ستّة إلّا ربع...هلّأ سبت وأحد مش مشكلة، منغطّ ... للسبعة!
ما سبعة بينزلو ولاد جيراني بأنفسن لحدّ البناية،حدّ الطابق الأرضي، وبالتحديد حدّ شبّاك الطابق الأرضي... وبيلعبو... وطبعًا مش شطرنج! فطبول.
و بما إنّي مواطن غبي، عندي سؤالين:
الأوّل: ليش الأوتوكار بدّو ياخد طفالا ستة إلّا ربع تيروحوا يتعلّموا؟ أيّ علم بدّو يفوت بدماغ ولاد واعيين خمسة الصبح تا يجي الأوتوكار ستّة إلّا ربع ينقلن عالمدرسة؟
والسؤال التاني من المواطن الغبي: السبت والأحد مش أصول يعني إنّو الأهل يخلّو ولادن بالبيت نايمين مرتاحين؟ أنا متأكّد انّو الأهل، زملائي المواطنين، مش هنّي يللي عم يبعتوا الولاد يدبّكو عشبّاك الطابق الأرضي لحتّى يحلّو عن سماهن ويخلّوهن هنّي يغفو بكلّ هناء...
لا... أكيد مش الأهل... ولَو!
أنا متاكّد ..بس كوني مواطن غبي، أصول إسأل... مش أصول؟